Пратеникот од ВМРО-ДПМНЕ, Љупчо Пренџов, изјави дека институциите успешно ја вршат својата работа во врска со истрагата за пожарот во Кочани, истакнувајќи дека јавноста има увид во напорите на МВР и министерот Панче Тошковски. Според него, во првата фаза од истрагата веќе има приведени и осомничени лица, што, како што нагласи, е значителен напредок во споредба со минатото, кога не биле поднесени никакви обвиненија.
„Во последните неколку години живи луѓе ни гореа, имавме нула обвинети, нула кривични пријави… денес имаме сосема различен случај“, изјави Пренџов, додавајќи дека во првите 72 часа од истрагата, над 30 лица биле повикани на распит, а 36 завршиле во притвор.
Пратеникот истакна дека ефикасноста на актуелната власт постепено ја враќа довербата на граѓаните во институциите. „Членови на СДС, ВМРО-ДПМНЕ и ДУИ се во притвор, тоа е фактичка состојба и само така треба да продолжиме“, додаде тој.
Пренџов го пофали министерот Панче Тошковски за неговата борба против криминалот и корупцијата, истакнувајќи дека бројот на избркани службеници од МВР значително се зголемил откако Тошковски ја презел функцијата. Според него, нема да има пардон за никого кој е вмешан во криминал, за разлика од минатото. „Панче Тошковски ќе ја истера работата до крај“, заклучи Пренџов.
