Денеска во Рим продолжуваат клучните преговори меѓу иранската и американската делегација за нуклеарното прашање на Иран, со посредство на Оман.
Иранскиот министер за надворешни работи, Абас Арагчи, изрази „сериозни сомнежи“ во намерите на САД пред почетокот на вториот круг преговори со Вашингтон.
„Иако имаме сериозни сомневања за намерите и мотивацијата на американската страна, ние ќе учествуваме во утрешните преговори,“ изјави Арагчи на прес-конференција во Москва, по состанокот со рускиот министер за надворешни работи, Сергеј Лавров.
Арагчи истакна дека Иран е целосно подготвен да работи на мирно решение на спорот, потврдувајќи дека целта е „мировната нуклеарна програма на Иран“.
Првиот круг преговори се одржа минатата недела во Маскат, Оман, каде Иран и САД го оценија како „конструктивен“.
Западните земји, предводени од САД и Израел, изразуваат сомневање дека Иран има намера да развие нуклеарно оружје, што Техеран категорично го отфрла, нагласувајќи дека има право да развива нуклеарни технологии за цивилни цели.
