– Во кругот на Подрачното училиште „Маршал Тито“ во село Банско денеска беше пуштено во употреба реконструираното мултифункционално спортско игралиште, кое е реконструирано со заедничка соработка на Општина Струмица и Видеолотарија „Касинос Австрија“.
Според градоначалникот на Струмица, Петар Јанков, оваа соработка е за поздравување и се надева дека ќе продолжи и понатаму.
-Општина Струмица обезбеди содветно бетонска подлога и инвестицијата на Општина Струмица изнесува 1.755.000 денари и со Видеолотарија беше обезбедена соодветна гумена подлога, оградување на игралиштето и потребните реквизити. Голема благодарност до Видеолотарија за тоа што излегоа во пресрет во реализацијата на ова игралиште. Се надевам дека оваа соработка ќе продолжи и понатаму, рече Јанков.
Вики Чадиковска, маркетинг директор на Видеолотарија „Касинос Австрија“, истакна дека како општествено одговорна компанија постојано инвестираат во спортот.
-Во изминатиот период со буџет од над еден милион евра успеавме да реконструираме 23 спортски игралишта ширум Македонија, а денес, на наше огромно задоволство, го ставаме во функција дваесет и четвртото за кое потрошивме 4.350.000 денари, истакна Чадиковска.
Игралиштето заедно со патеката за поставување клупи се простира на површина од 950 квадратни метри, поставена е еластична гумирана подлога, оградено е со метална ограда и пластифицирана мрежа, а поставени се голови за мал фудбал и ракомет, како и кошеви.
