Собранието денеска треба да ја продолжи 102. седница, на чиј дневен ред преостанати се уште 11 точки. Пред пратениците денеска е предлог-законот за задолжување за општи буџетски потреби, во износ од 260 милиони евра, кој се носи по скратена постапка.
Според предлог-законот, заемот ќе се повлече во една транша во согласност со роковите и условите утврдени во договорот за заем, рокот за отплата на заемот е седум години, на девет еднакви полугодишни рати, со вклучен грејс-период од три години. Каматната стапка е варијабилна и се состои од шестмесечен ЕУРИБОР, зголемен за маргина што изнесува 2,10 проценти.
– Македонија ќе им плати на заемодавачите еднократна провизија во износ од 1,4 процент од износот на заемот. Македонија на агентот на заемодавачите ќе му плаќа провизија во висина од 12.500 евра на годишно ниво – се посочува во предлог-законот објавен на собраниската веб-страница.
На дневен ред на собраниската седница се и Фискалната стратегија на Македонија за 2027 – 2031 година, предлог-законот за изменување и дополнување на Законот за медијацијата, предлог-законот за изменување на Законот за ученичкиот стандард, предлог-законот за изменување и дополнување на Законот за студентскиот стандард, предлог-законот за изменување на Законот за основање јавно претпријатие „Македонска радиодифузија“, предлог-законот за изменување на Законот за внатрешните работи, предлог-законот за изменување и дополнување на Законот за внатрешните работи, предлог-законот за изменување и дополнување на Законот за полицијата и предлог-законот за изменување и дополнување на Законот за финансиската поддршка на инвестициите, сите по скратена постапка, и годишниот извештај за работата на Судскиот совет на Македонија за 2025 година.
