Модуларната болница, бонусите на СЈО, поголема самостојност, обвинителите да се вооружаат со докази, а не да работат под на притисок на јавноста и да се интервенира во успехот на Обвинителството за гонење на организиран криминал, кој наликува како да сме Северна Кореја. Долг е списокот со очекувањата на дел од правната фела од новиот државен обвинител. Адвокатот Сашко Дуковски е пријатно изненаден од владиниот предлог за државен обвинител, судијата Ненад Савевски. Тој очекува многу од него и верува дека Савевски ќе има намера и волја да среди многу работи во Обвинителството. Дуковски е убеден дека ако Савевски го земе кормилото, законот ќе важи за сите, а не како досегашната пракса, луѓе со пари излегуваат од притвор уште за време на истрага
Адвокатот Дуковски очекува дека Савевски ќе отвори истраги за предметите за кои имаат огромен јавен интерес, а документите фаќаат прашина во фиоките на Обвинителството. Објаснува дека Савевски е искусен правник бил обвинител и судија, па многу солидно ги познава сите фази од кривичната постапка.
Собранието закажа пленарна седница за 18 март на која пред пратениците ќе биде предложен Ненад Савевски за избор на државен обвинител.
Инаку, кариерата на Савевски во правосудството се развивала постепено. Започнал како судски приправник во Основниот суд во Гостивар, потоа работел како стручен соработник, а од 2009 до 2016 година бил јавен обвинител. Од септември 2016 година е судија во Кривичниот суд во Скопје, каде работи на предмети од кривичната област, вклучително и организиран криминал и корупција. Во изминатите години бил и предавач на Академијата за судии и јавни обвинители.
Во трката за државен јавен обвинител имаше пет кандидати. Советот на јавни обвинители на 17 февруари даде позитивно мислење за четворица: в.д. државната обвинителка Анита Тополова-Исајловска, обвинителката Ленче Ристовска, судијата Ненад Савевски и обвинителката Лидија Раичевиќ.