Пожар во отпад за хаварисани возила создаде црн облак над Скопје. Повремено се слушаа детонации од плински боци, а повреден е еден пожарникар за време на гаснењето на огнот.
Пожарот настал утрото околу 8 часот и 30 минути, а локалното население со луѓе од општината веднаш почнале да го гаснат. Поради ветерот ја изгубиле контролата врз пламените јазици и пламенот стигнал до првите куќи што се наоѓаат во близина на отпадот. Жителите од Шуто Оризари учествувале, а Курту Дудуш побарал помош од ЦУК и Дирекцијата за заштата и спасување. Скопската бригада испрати четири против пожарни возила, а се делуваше и од воздух. Еден полициски хеликоптер и „ер-тракторот“ истураа вода околу два часа врз пожарот. Со трактори и багер се копаше земјата околу пожарот за да се зафати и тревата околу отпадот.
- „Се приближи пожарот до ѕидовите до куќите и направивме напори со екипите од пожарна, сега за сега е локализиран, а жариштето се уште гори“ рече Курту Дудуш – Градоначалник на Општина Шуто Оризари.
Навреме беше спречено проширувањето кон куќите. Додека пожарникарите се обидуваа да го локализираат пожарот настана масовна тепачка во дворот на фирмата за отпад, а полицијата ги раздвојуваше. Претходно од страна на сопственикот на отпадот за старо железо беше нападната новинарска екипа.
Од МВР потврдија дека еден е повреден, а сопственикот на отпадот е уапсен.
- „Денеска (09.07.2025) во 09.16 ч. во СВР Скопје е пријавено дека на отпад за старо железо ул. „Б. Буна“ во Скопје има пожар односно дека горат хаварисани возила, на кои имало монтирано плински уреди и се слушаат детонации од истите. До сега нема зафатено приватен имот – куќи. Се преземаат мерки за гасење на огнот и расчистување на случајот. До овој момент едно лице е повредено и е пренесено за укажување лекарска помош,“ стои во информацијата од МВР.
Според Дудуш, општината издала позитивно мислење на фирмата за отпад во ноември, а не е запознаен дали добиле дозвола од Министерството за екологија.
- „Дозволата важела до февруари 2025, но во ноември 2024 имаат поднесено ново барање, но до каде е барањето немаме информација бидејќи кај нас се бара само мислење “ рече Дудуш.
Поради која причина избувнал пожарот засега е непознато.
