Федералното обвинителство во Швајцарија подигна обвинение против две лица осомничени за поврзаност со тероризам.
Според порталот на албански јазик во Швајцарија “Албинфо”, станува збор за косовски и македонски државјанин, кој поседувал и швајцарско државјанство.
Обвинението ги товари дека Косовецот бил одговорен за швајцарскиот огранок на косовската исламска терористичка организација.
-Косовската терористичка организација имала за цел не само да собере што е можно повеќе верници за својата салафистичко-џихадистичка кауза и идеологија, туку и да извлече корист од дестабилизацијата на државата Косово и, со сила на оружје, да преземе контрола врз одредена територија и таму да создаде исламска држава управувана во име на Исламската држава според шеријатот, се наведува во соопштението на Швајцарското федерално обвинителство.
Се додава дека во 2014 и 2015 година, неколку мажи што зборуваат албански јазик, вклучувајќи го 36-годишниот Емир, косовски државјанин, и второобвинетиот, 33-годишник со двојно, швајцарско и македонско државјанство, ги здружија силите и формираа група што ја следеше идеологијата на Исламска држава. Се тврди дека Емир, првообвинетиот, бил избран за водач на групата, која подоцна станала швајцарски огранок на косовската терористичка организација.
-36-годишниот Емир, кој беше лицето одговорно за групата, е обвинет за индоктринација и регрутирање нови членови во име на оваа терористичка организација, особено во регионот на Женева, со поддршка на второобвинетиот. Обвинителството се сомнева дека тој бил и член на раководството на терористичката група во Косово, одговорен за швајцарскиот огранок и ко-одговорен за регионален огранок, се нагласува во соопштението.
Се вели дека тој бил одговорен за управување со швајцарската филијала и обезбедување врска помеѓу раководството на Косово и филијалата во Женева. Исто така, се нагласува, дека собирал пари од членовите на филијалата во Женева и ги испраќал во Косово за финансирање на разни активности на терористичката организација таму.
Според Канцеларијата на Швајцарскиот федерален обвинител, обвинетите, исто така, финансирале поткуп на странски службеници одговорни за гонење на членови на терористичката организација. Ова му овозможило на еден од членовите на оваа организација да избегне гонење.
Македонскиот граѓанин е обвинет и дека е член на швајцарскиот огранок на терористичката организација. Тој присуствувал на состаноците на огранокот и го ставал својот стан на располагање за такви настани. Покрај тоа, организирал посети на странски проповедници за кои е познато дека ги следат наредбите и верувањата на Исламската држава.
Швајцарското федерално обвинителство го обвинува и за самостојно ширење пропаганда во корист на терористичките организации Исламска држава и Фронтот Ал-Нусра, ширел песни во кои се величат овие две терористички организации.
Обвинението, исто така, се наведува, фрла светлина врз важноста на Западниот Балкан за џихадистичките организации, каде што Косово служи како поврзувачка точка помеѓу осомничените во Западна Европа и меѓународните структури на ИСИС.
