Над 100 бизнисмени од Србија и Македонија ќе договараат нови форми и методи за соработка. Ова се очекувањата од претсојниот форум кој на 2 и 3 декември ќе се одржи во Скопје. Продлабочувањето на економската соработка и партнерството беа и во фокусот и на разговорите за време на работната средба помеѓу вицепремирот и министер за односи меѓу заедниците, Стоилковиќ и неговата српска колешка, Адријана Месаровиќ.
„Во овој момент сите три стопански комори во нашата држава се сложија заеднички да учествуваат во целата приказна, што е нов момент во историјата на македонската приказна и во начинот на организирањето на стопанските комори од една страна. Се надевам дека во соработка со српската стопанска комора сето тоа ќе донесе многу резултати и се надевам дека ќе се отворат нови патишта за соработка.“– изјави заменик претседателот на Владата и министер за односи меѓу заедниците, Иван Стоилковиќ.
Стоилковиќ очекува дека ќе се решат и големи проблеми на стопанствениците.
„Пред се бизнис форумот доаѓа како резултат на барањата на стопанствениците за некои работи побрзо да се решаваат. Најголема примедба од стопанствениците е долгото чекање на граничните премини, така да од тој аспект ова во годинава што изминува, дававме напори во насока тоа да се разрешува. Втората работа во тој аспект беше идејата за проширување на граничните премини затоа што многу се доцни со испораките, и многу други прашања поврзани со гаранција на странските инвестиции и сето она што значи ослободување на бизнисот од стегите на администрацијата.“- изјави Стоилковиќ.
Инаку трговската размена со Србија од година во година бележи раст. Во 2024 изнесувала 1, 4 милијарди евра, а годинава само за девет месеци надминала 1,1 милијарди евра и очекувањата се дека ќе заврши со поголем раст од лани.
Потпретседателот на Владата, Иван Стоилковиќ учествуваше и на првата конференција „Western Balkans 2030“, што ги обединува меѓународните, европските и регионалните институции, инвеститори и иноватори. Настанот, организиран со поддршка од Европската инвестициска банка и ОН, има за цел да го истакне потенцијалот на регионот и да прерасне во годишен форум што ќе се одржува во различни градови низ Западен Балкан до 2030 година.
