Силен порој го преплави срцето на Каталонија, поплави болница во Барселона и приземји патнички авион, додека аеродромот и железничкиот сообраќај беа целосно запрени, јави Ројтерс.
– Властите прогласија црвен метеоаларм – изјави портпаролот на Државната метеоролошка агенција на Шпанија.
Агенцијата соопшти и дека во некои делови на земјата наврнале до 90 литри дожд на квадратен метар за само неколку часа. Некои медиуми во Шпанија напишаа дека бројката изнесува и над 100 литри. Болница во Барселона мораше да го прекине приемот на нови пациенти поради поплавен подрум и прекин на струја, а патнички авион кој полетал кон САД се вратил назад бидејќи од силниот дожд и град му бил оштетен носив дел. Железничкиот сообраќај низ Каталонија беше стопиран.
