Големи поплави го погодија источниот брег на Австралија, луѓе останаа заробени на покривите. Обилни дождови предизвикаа поплави долж источниот брег на Австралија, сериозно погодувајќи ги помалите градови на околу 250 километри северно од Сиднеј, каде жителите беа заробени на покриви.
Австралиската телевизија „Еј-Би-Си“ информира за поплави од невидени размери, опишувајќи драматични сцени додека хеликоптери и чамци ги евакуираа жителите заробени на покриви, среде обилни дождови и силни ветрови, придружени со ниска температура.
Некои жители ја поминаа ноќта заглавени на покривите, среде надојдените води. Реката Менинг во регионот се искачи на рекордно ниво од над 6 метри, а властите предупредија дека нивото на реката може да се зголеми уште повеќе, доколку продолжат обилните дождови.
Повеќе од 80 училишта останаа затворени, а во регионот има и прекини на струја. Метеоролозите предвидуваат обилни дождови до петок.
