По соборувањето на руските дронови во полскиот воздушен простор, Полска побара итен состанок на Советот за безбедност на Обединетите нации. Јужнокорејската мисија при ОН, која претседава со Советот во септември, соопшти дека во моментов се договара датумот на состанокот. Претходно, Словенија, Данска, Грција, Франција и Велика Британија веќе побараа состанок на Советот за безбедност во петок, како што беше соопштено од дипломатски извори.
Полската армија, но и партнерите во НАТО, се загрижени по вчерашниот инцидент во кој на полска територија беа соборени руски беспилотни летала што влегле во нејзиниот воздушен простор. Полскиот премиер Доналд Туск смета на поддршка од НАТО и побара консултации со сојузниците. Тој го осуди навлегувањето на руските беспилотни летала во воздушниот простор на земјата. Соборени биле 16 летала.
Ова е прв пат членка на НАТО да дејствува директно против руски беспилотни летала во својот воздушен простор откако започна војната во Украина во 2022 година. Русија, пак, демантираше дека целта и била напад на Полска. „Овие конкретни факти целосно ги демантираат митовите што Полска повторно ги шири за да ја ескалира украинската криза“, се наведува во соопштението на руското МНР.
Европската Унија остро го осуди нападот. Реагираше и американскиот претседател Доналд Трамп.
