Истанбулската конвенција во нашиот систем половично е имплементирана, а преземените мерки за заштита од семејно насилство не се доволно ефикасни. Владата на СДСМ и ДУИ ја ратификуваа конвенцијата на Советот на Европа, но спровеле само 48 % од предвидените 52 активности, 32 % воопшто не се реализирани, а рестото се делумно направени. Ова се резултати на извештајот за имплементација на Истанбулската конвеција за периодот 2018-2023, на Државниот завод за ревизија. Главниот ревизор Максим Мицевски вели дека немаме доволен број на шелтер центри, обучен кадар во центрите за социјална работа, а најголемите пропусти се во превенцијата.
За тој период, во земјава се регистрирани над 6000 случаи на семејно насилство, од кои над 60 % се со телесни повреди, а околу 30 отсто се животозагрозувачки. Уште пострашно е тоа што од 2023-тата па наваму, државата нема усвоено национална стратегија за спречување и превенирање на семејно насилство.
Последниве две години алармантен е бројот на случаи на насилство.
Годинава, од јануари до јуни направени се 512 кривични дела поврзани со семејно насилство. Од нив, над 300 случаи се со тешки телесни повреди, три убиства, и уште три обиди за убиство. Од 512 евидентирани сторители, 474 се мажи, а 55 се жени. Според статистиката на МВР, најчесто сторителот е: сопруг или партнер, потоа син, па татко. Голем дел од сторителите делото го извршиле под влијание на алхолол, дури во 70 инциденти. Под дејство на дрога биле десетина сторители, а останатите стотици насилници не биле под никакво опојно влијание.
Во Скопје има евидентирани 127 кривични дела, во Битола 59, во Велес 50 кривични дела, во Куманово 57, во Тетово 70 кривични дела.
Последниот фемицид што се случи во Велес во септември годинава, предизвика лавини реакции во јавноста.
