Нови апсења за трагедијата во Кочани во која загинаа 63 млади, а над 200 беа повредени. Приведени се единаесет вработени во УЈП и Државниот пазарен инспекторат.
Според првичните информации, најмалку шестмина од лицата се уапсени, а против сите се покренати кривични пријави за разни кривични дела – од злоупотреба на службената положба, примање поткуп, до фалсификување исправи. Неофицијално, меѓу приведените има поранешни раководители на УЈП, кои во одреден период биле и претседатели на ОО на СДСМ во Штип, како и блиски роднини на судијка и поранешен министер.
Освен од Штип, меѓу приведените има вработени и во подружниците на УЈП во Струмица и Кочани. Како што потврди денеска главниот јавен обвинител Љупчо Коцевски, вчера и денес се спроведуваат интензивни активности, вклучувајќи приведувања и претреси на лица опфатени со кривичната пријава.
„Јавноста беше запознаена дека се водеше предистражна постапка за лица вработени во УЈП, поврзани на некој начин со кочанскиот предмет. Во текот на минатиот ден и денеска се преземаат одредени дејствија, приведени се околу десетина лица и во моментот се вршат претреси на лица опфатени со кривичната пријава“, изјави главниот јавен обвинител, Љупчо Коцевски.
Коцевски појасни дека во акцијата се користат и електронски комуникации како доказен материјал. Обвинителот објасни дека овој предмет не може да се спои со истрагата за пожарот во дискотеката, бидејќи се работи за различни кривични деликти.
„Овој предмет не може да се спои со сегашниот – кочански предмет, затоа што овде не е поврзаноста на штетната последица, односно смрт. Ова се кривични дела за злоупотреба, давање и примање поткуп што нема врска со овој кривичен-правен настан, односно со предметот што е во тек во моментот“, изјави Коцевски.
Вчера во судницата Идризово започна судењето за најголемата трагедија во поновата историја на Македонија, дискотеката „Пулс“. Ново рочиште е закажано за наредниот вторник. На обвинителна клупа седнаа 35 физички и 3 правни лица.
