Доброволното противпожарно друштво од Кочани ги започна подготовките за oвогодишното издание на „Kochani Fire Challenge 2026“, кое ќе се организира по повод малиот јубилеј – пет години од формирањето на друштвото, прво во регионот.
Минатата година настанот се одржа на СРЦ „Бавчалук“ во Кочани и привлече голем број учесници, доброволни противпожарни друштва и посетители од Македонија и опкружувањето.
Преку повеќе натпреварувачки дисциплини и показни вежби, учесниците ги демонстрираа своите вештини, физичка подготвеност и тимска работа.
Во изминатите пет години години, активностите на „Kochani Fire Challenge“ се одржуваа на повеќе локации во градот, во Паркот на Револуцијата, просторот кај Градскиот трговски центар, кругот на Територијалната противпожарна единица, Споменикот на слободата, како и во коритото на Кочанска Река, каде беа организирани различни показни вежби и активности.
Посебен белег на настанот е вклучувањето на најмладите. Во дел од активностите учествуваа и ученици од основните училишта од Кочани, Зрновци и Чешиново-Облешево, кои преку едукативни и практични содржини се запознаа со основите на противпожарната заштита и значењето на доброволното пожарникарство.
Организаторите од ДПД Кочани најавуваат дека и ова јубилејно издание ќе понуди богата програма, со цел промоција на доброволното пожарникарство, размена на искуства и подигнување на свеста за заштита и спасување.
