Кривична пријава заработија двајцата браќа од ромската националност, кои пред неколку дена јавно се закануваа со убиства и немири доколку полицијата се обиде да ги легитимира или да им одземе возило поради непочитување на законските прописи. Пријавата ја поднел Независниот полициски синдикат.
„Очекуваме Обвинителството од Битола веднаш да постапи на истиот начин како што постапува против нас и уште утре да побара притвор за овие лица. Доколку ова не се случи во најкус можен рок, нека бидат сигурни дека нивното непостапување нема да остане незабележано“, велат од синдикатот.
Еден од пријавените се извини на социјалните мрежи за упатените закани. Тој неколкупати повторува дека таквото однесување нема да му се повтори.
Подоцна следуваа и нови извинувања и покајанија од други учесници во протестите. Граѓани во Битола, Штип и Прилеп неделава во неколку наврати протестираа со блокади на патиштата, при што палеа гуми и дрва, реагирајќи затоа што им биле одземени возилата поради тоа што немале возачки дозволи.