Почна реконструкцијата на капелата на градските православни гробишта во Куманово. Како што информираа денеска надлежните со реконструкцијата ќе се обезбеди современ, функционален и достоинствен простор.
– Како локална самоуправа остануваме посветени на реализација на капитални инвестиции и активно работиме на обезбедување финансиски средства од централната власт и други извори, со цел да создадеме подобра инфраструктура и повисок квалитет на живот за сите граѓани- наведува во објава градоначалникот на Куманово, Максим Димитриевски.
Директорот на јавното претпријатие, „Чистота и Зеленило“ Сашо Томиќ, изјави дека за време на реконструкцијата капелата нема целосно да биде затворена.
– Реконструкцијата ќе се одвива во две фази, при што дел од просториите ќе останат во функција за непречено одвивање на погребалните обреди, рече Томиќ.
Од јавното претпријатие апелираат до граѓаните да покажат разбирање за време на изведувањето на градежните работи, да ги почитуваат поставените ознаки и упатствата и да се движат внимателно во делот каде што ќе се реализира реконструкцијата. Оттаму замолуваат за трпение и разбирање до завршувањето на проектот. Проектот финансиски е поддржан од Министерството за транспорт и врски.
