Ангел Самараков, полицискиот службеник од Шестата управа која обезбедува ВИП-личности и кој беше дел од тимот што го обезбедуваше премиерот Христијан Мицкоски, денеска седна на обвинителна клупа во скопскиот Кривичен суд.
Тој се изјасни за невин по обвинението за оддавање службена тајна на лице кое во постапката се води како сведок – Благоја Коруноски. Во воведниот збор обвинителката рече дека ќе докаже дека Самараков на 30 март 2025 година, околу 23 часот, на паркинг пред хотелот „Гарденија“ во Велес, како службено лице вработено во МВР, а од користољубие, на сведокот Благоја Коруноски му дал достапни службени документи на МВР кои се службена тајна, за сведокот тие документи да ги објави на социјалните мрежи. За тоа, Самараков требал од лицето Лелита Трајковска-Миленкова да наплати 50 илјади евра.
Неговиот бранител, пак, рече дека ќе го убеди судот оти неговиот клиент не ги сторил дејствијата опишани во обвинителниот акт, затоа што обвинителството користело докази што незаконски ги прибавиле и не може да се предмет на докажување во кривична постапка.
