Во Франција, од изутрината – ескалира големиот синдикален штрајк, а полицијата веќе приведе триесет демонстранти во градовите Тулуз, Брест и Марсеј. Бројката, според надлежните, може драстично да се зголеми во текот на денот, бидејќи на улиците низ целата земја се очекува да излезат помеѓу 600 и 900 илјади граѓани. Денешните протести се организирани на 250 локации. Само во раните утрински часови беа регистрирани повеќе од четириесет блокади на патиштата, а полицијата успеа да расчисти само дел од нив. Во Париз, каде што се очекува најмасовното присуство, веќе владее страв од немири. Шефот на полицијата предупреди дека протестниот марш може да излезе од контрола и ги повика трговците да ги затворат продавниците. Штрајкот ја парализира Франција. Железницата сообраќа со половина капацитет, париското метро е сведено на само неколку линии, а секој трет регионален воз е откажан. Во училиштата, секој трет наставник одбива да држи настава, а граѓаните ќе се соочат со огромни тешкотии и во здравството, откако дури 98 проценти од аптеките објавија дека им се приклучуваат на протестите.
