9-те лекови на проширената позитивна листа, за висок крвен притисок, срцеви заболувања, третман на депресија и за деменција, од денеска пациентите можат со рецепт да ги земаат во аптеките. Но ова е само почеток, велат здравствените власти и премиерот. Министерот Таравари уверува дека најави дека отсега на секои три до четири месеци ќе има надополнување на позитивната листа од плус еден до три лекови.
И премиерот Мицкоски вели дека надополнувањето на позитивната листа нема да застане тука.Тој вели дека Владата ќе се залага на неколку месеци да се додаваат нови лекови, затоа што според него граѓаните заслужуваат современа и поевтина терапија.
“Во периодот што следи ќе гледаме на секој квартал по еден-два до три лека да ги ставаме на таа позитивна листа и тоа да биде пријатно изненадување за граѓаните. Со овие 9 генерички лека, мислам дека драматично ќе се подобри понудата и ќе се заштедат средства коишто досега ги плаќаа на приватна сметка граѓаните, а сега ќе бидат на товар на Фондот“, изјави претседателот на Владата, Христијан Мицкоски.
Ставањето нови лекови на позитивната листа во пракса значи дека пациентите ќе добиваат посовремени и поевтини лекови на рецепт, на товар на државата, наместо да плаќаатт од џеб и поскапо -често и од други држави. Затоа што листата не беше ажурирана повеќе од една деценија, граѓаните добиваат застарени лекови, иако постојат нови и поефикасни за нивната болест.
