Владата нема ингеренции за да интервенира во решавањето на водоснбадувањето на територија на град Скопје, ова денеска го одговори министерот за локална самоуправа, Златко Перински кој одговараше на новинарско прашање дали како Влада можат да помогнат во решавањето на проблемот со водоснабдувањето, бидејќи повеќе населби во Скопје се соочуваат со немање на вода за пиење во своите домови.
-И согласно законот за локална самоуправа, но и согласно законот за води одговорноста во делот на водоснабдувањето е во рамки на локалната самоуправа т.е во рамки на град Скопје. Владата тука нема никакви ингеренции, тоа сакам да го кажам, најдиректно за да стане јасно на нашите граѓани, вели Перински.
Тој додаде дека ова е кулминација од сите натложени проблеми, коишто го тиштат градот Скопје во изминатите повеќе од три и пол години и какошто рече не е само на ниво на град Скопје, туку овие проблеми кулминираат и во рамки на самите Јавни претпријатија.
-Знаете како, од она што јас го имам како информација, тоа е дека станува збор за технички проблем и мислам дека тоа многу соодветно да ви го потврди и самиот менаџмент на Јавното комунално претпријатие „Водовод и канализација“-Скопје, изјави Перински.
Министерот за локална самоуправа Перински упати и апел до новинарите да видат во кој дел од Скопје се направени најголемите инвстиции во изминатите над три години, а од кои произлегуваат и техничките проблеми.
-Но, она што е уште по интересно, еве упатувам и еден апел до вас до новинарите, да видите каде се најголемите инвестиции, којшто градот Скопје и Јавните комунални претпријатија ги имаат направено во изминатите би рекол три години и многу брзо и јасно ќе ви стане одговорот, зошто во моментов ги имаме овие технички проблеми, вели Перински.
