Се тенчи трпението на пензионерите. По неуспешниот обид на Уставен да им ги ускрати повисоките пензии кои ги добија со одлука на влада, највозрасните граѓани им порачаа на дел од судиите. „Нашите пензии не се само бројка на хартија, туку живот“. „Не ни ги кратете парите од удобните фотелји, затоа што ние живееме од нив“. Пензионерите категорични, велат дека никој нема право да си игра со нивните судбини и животи и апелираат судиите да престанат да ја мерат уставноста на владината мерка на нивна сметка. Додека во судниците се бројат членови и алинеи, оние со најниски примања се жалат дека ги бројат последните денари до Нова година.
И додека дел од судиите сакаат да им ги ускратат зголемувањата на пензионерите, во исто време им остана неисполнета новогодишната желба за повисоки плати. Со петни жили се обидуваа да ја убедат јавноста дека одлуката на Владата да не им одобри дополнителни средства, претставувало директен упад во финансиската независност на судството и обвинителството. За пензионерите со ваквото лицемерие одамна ја прелиле чашата.
Вчерашното гласање на Уставен за укинување на линеарното зголемување во спортски жаргон, заврши нерешено, 4 : 4. Претседателот на Уставен, Костадиновски, најави дека ново гласање ќе има откако ќе се комплетира целиот состав на судии. И додека законот е на тест, пензионерите се во грч, но велат, дека со досегашните зголемувања полесно се дише.
Животот им е поподнослив и подостоинствен. Со зголемувањата во 2024 и 2025 станаа побогати за околу 6.000 денари, а дополнителни 1.000 денари може да очекуваат и следната година. Најниската пензија сега надминува 18.000 денари, просечната е над 26.000, а има и пензии кои достигнуваат над 80.000 денари.
