Амбасадата на Грција во Скопје и Правниот факултет „Јустинијан Први“ при Универзитетот „Св. Кирил и Методиј“ заеднички организираа панел-дискусија посветена на книгата „Погребното слово на Перикле“ од Тукидид, еден од највлијателните текстови во политичката историја. Воедно, на настанот беше промовиран и новиот превод на „Погребното слово“, објавен од издавачкиот центар TРИ, стои во соопштението од Амбасадата на Грција во Скопјe.
Деканот на Правниот факултет, д-р Сашо Георгиевски ја отвори дискусијата нагласувајќи дека слободата и стабилноста зависат од активното учество на граѓаните во управувањето, истакнувајќи ја и важноста на академската соработка. Амбасадорката на Грција во Северна Македонија, Софија Филипиду, истакна дека Погребното слово останува релевантно и денес затоа што ја претставува демократијата како култура изградена врз граѓанска одговорност, еднаквост пред законот и посветеност на општото добро.
Преведувачката на книгата и виш научен соработник во Институтот за старословенска култура, д-р Марија Чичева-Алексиќ, зборуваше за значењето на директниот превод од старогрчки јазик, истакнувајќи ги вредностите на arete (извонредност) и kalagathos (граѓанска доблест), кои се во сржта на Погребното слово.
Професорот Спиридон Влахопулос (Национален и Каподистриски универзитет во Атина) го анализираше Погребното слово од уставна гледна точка, наведувајќи дека за Перикле граѓанското учество не е само право, туку и должност. Демократијата не зависи само од институциите, туку пред сè од активни граѓани кои учествуваат и преземаат одговорност за јавниот живот. Тој дополнително нагласи дека атинската слобода никогаш не била поистоветена со беззаконие, туку со почитување и на пишаните закони и на непишаните норми.
Професорката Јулија Брсакоска Базеркоска (Универзитет „Св. Кирил и Методиј“) го анализираше текстот низ призмата на меѓународните односи, претставувајќи го Перикле како модел на одговорно демократско лидерство. Поаѓајќи од Пелопонеската војна, таа ги разгледа согледувањата на Тукидид за човечката природа и однесувањето на државите, осврнувајќи се и на современи концепти како „Тукидидова стапица“ и безбедносната дилема меѓу растечки и воспоставени сили. Таа ја истакна континуираната важност на демократските вредности, силните институции и одговорното лидерство.
Професорот Ненад Марковиќ (Универзитет „Св. Кирил и Методиј“) идентификуваше пет клучни граѓански вредности во говорот на Перикле — евномија, изнономија, исегорија, паресија и филантропија, и ги поврза со три главни дебати во современата демократска теорија: партиципативна, асоцијативна и делиберативна демократија. Тој го опиша текстот не само како погребен говор, туку и како концизен водич за организирање политички заедници, при што посочи и на често занемареното размислување за рамнотежата меѓу граѓанската должност и личната благосостојба.
Модератор на панел-дискусијата беше заменик-деканот, д-р Драган Гоцевски, а панелот заврши со отворена дебата за демократијата, граѓанската должност и релевантноста на класичната мисла во современите предизвици.
