Првата детска амбасада во светот Меѓаши денеска организира панел-дискусија на тема „Ученички активизам за безбедни училишта“. Фокусот ќе биде ставен на потребите и предизвиците со кои се соочуваат образовните институции при справувањето со различни форми на насилство.
-Настанот ќе придонесе за промовирање на добрите практики идентификувани и поддржани преку проектот, како и за отворање дискусија за предизвиците во препознавањето, превенцијата и справувањето со сите видови насилство во училиштата, наведува Меѓаши.
Воведни обраќања ќе имаат Драги Змијанац, претседател на Меѓаши и Зоран Илиески, извршен директор на Коалицијата на младински организации СЕГА. Потоа следуваат панел-дискусиите: „Актуелни политики и пристапи при справување со различни форми насилство“ и „Практични искуства, придобивки и предизвици со модел за безбедна училишна средина“.
Настанот се организира во рамки на проектот „Промоција на безбедна училишна средина“, што го спроведува Коалицијата на младински организации СЕГА, во партнерство со Македонскиот центар за граѓанско образование, Првата детска амбасада во светот Меѓаши и СМАРТ АП – Лабораторија за социјални иновации, а е финансиски поддржан од Детската фондација Песталоци.
