Палевски не ја призна вината за убиствата на Вања и Панче
Во Основниот кривичен суд во Скопје денеска започна сведочењето на Љупчо Палевски, првообвинет за двојното убиство на 14-годишната Вања Ѓорчевска и велешанецот Панче Жежовски.
Пред судот, Палевски изјави дека се чувствува невин и негираше дека ги извршил грабнувањата и убиствата. „Не сум ги извршил убиствата, ниту грабнувањата. Немам мотив за такво дело“, рече тој во своето сведочење.
Палевски тврди дека поседува информации што би можеле да наштетат на политичари и новинари, наведувајќи дека доколку имал користољубиви мотиви, би ги искористил тие податоци.
Покрај тоа, ги обвини медиумите за, како што рече, некритичко пренесување на наводни лаги.
„Додека бев во Турција, мојот адвокат ми пренесе дека се води медиумска хајка против мене. На денот кога беше поднесена кривичната пријава, постоело само едно вештачење – за телефонот на Панче Жежовски. Сите други вештачења се направени по тој датум“, изјави Палевски.
Пред него сведочеа и другите осомничени: Боре Видевски, Велибор Манев, Влатко Кешишов и Александар Ѓорчевски.
Според обвинението, тие заедно го испланирале грабнувањето на Вања Ѓорчевска со цел да изнудат откуп од нејзиното семејство. Панче Жежовски, пак, наводно бил грабнат за да им го предаде своето возило „Цитроен“, со кое планирале да го изведат грабнувањето на девојчето.
Вања и Панче беа пријавени за исчезнати на 27 и 24 ноември 2023 година, а нивните тела беа пронајдени на 3 декември, во близина на Скопје и Велес.
