Во фер и мирна атмосфера гласаа македонските граѓани на изборите за градоначалници и советници. Изборниот ден помина без посериозни нерегуларности, надлежните институции внимателно го следеа целиот процес. На неколкуте места каде што бил нарушен јавниот ред и мир било реагирано навреме, со цел да се обезбеди непречено гласање.
Регистрирани биле 29 прекини во траење од 15 до 30 минути, кои настанале најчесто поради технички проблеми со уредите за идентификација. Истите во најкус рок биле решени и се продолжило со гласањето . Најголемиот дел од нив се случиле во Тетово и Охрид.
„Пријавени се вкупно 91 настан на територија на Македонија. Од кои најголемиот дел се однесуваат на агитирање и можен поткуп, а дел на фотографирање на гласачкото ливче лепење плакати и упатени закани. По превземени мерки, за 42 од пријавените случаи постапките се завршени, а во најголем број истите наоди не се потврдени“, изјави министерот за Внатрешни работи Панче Тошковски.
Од ОЈО велат дека бројката за сторени кривични дела направени во текот на избирачкиот процес во Македонија е мал и дека обвинителствата веќе превземаат дејствија за нивно целосно испитување. Регистрирани биле неколку случаи за наводен поткуп и влијание врз гласачите.
„ОЈО Велес презема дејствија за испитување на наводи за поткуп при избори и гласање, против две лица во селото Согле, Општина Чашка. ОЈО Крива Паланка исто така испитува наводи за поткуп на гласачи. ОЈО Скопје е известено од МВР за две задржани лица на гласачко место во Општина Чаир кои одбивале да се легитимираат, како и за 2 фотографирања на гласачко ливче во Гази Баба“, велат од Основното Јавно Обвинителство.
Оценка дека изборите беа фер, слободни и демократски стигна од сите политички партии . СДСМ и ДУИ посочија само неколку изолирани случаи, за кои најавија дека институционално ќе реагираат. Забелешките ќе ги разгледува ДИК.
