Четири лица се во критична состојба, а уште четиринаесет беа повредени кога една жена ги нападна со нож на железничка станица во Хамбург. Станува збор за 39-годишна Германка која брзо била уапсена и не дала отпор на полицијата.
Таа е во притвор и денеска треба да се појави во суд. Полицијата засега претпоставува дека нема политички мотив за нападот. „Веруваме дека таа делувала сама и дека немала политички мотиви. Се чини дека таа била во состојба на ментално растројство“, изјави портпаролот на полицијата на Хамбург. Нападот се случил околу 18 часот во период кога на железничката станица имало голема раздвиженост на патници.
