Општина Струмица објави Јавен повик за користење на јавни површини за поставување на времени објекти за време на одржувањето на манифестацијата „Струмички карневал“, односно за главната карневалска вечер,која ќе се одржи од 21 до 22 февруари, соопштија од локалната самоуправа.
Како што се наведува, овој повик се објавува за првпат со цел појасно уредување на користењето на јавните површини, подобра организација, уреден изглед на просторот и обезбедување еднакви можности за сите заинтересирани учесници.
-Право на поднесување барање имаат правни лица регистрирани во Централниот регистар на Македонија, како и физички лица регистрирани за вршење занаетчиска дејност и евидентирани во Занаетчиската комора, при што еден корисник може да користи само една локација, се наведува во повикот.
Јавните површини ќе бидат обезбедени на однапред утврдени и обележани позиции, распоредени по зони согласно локациската поставеност, при што секоја позиција опфаќа површина од 4 метри квадратни. Надоместокот за користење на јавна површина изнесува 6.000 денари по позиција за целото времетраење на манифестацијата и се уплатува на сметка на организаторот, при што уплатениот надоместок не подлежи на поврат.
Се додава дека барањата се поднесуваат до Општина Струмица – Сектор за урбанизам, комунални работи и градежно земјиште, со задолжително доставување барање, доказ за извршена уплата и соодветна документација за регистрација. Рокот за поднесување на барањата е до 16 февруари.
Инаку, распределбата на локациите ќе се врши по принципот „прв дојден – прв услужен“, до исцрпување на расположливите позиции, при што Општина Струмица го задржува правото да одбие барање доколку предложената дејност или изгледот на објектот не се во согласност со концептот, безбедноста или организацијата на манифестацијата.
