Нови мерки за поддршка на учениците воведува Општина Маврово и Ростуше, овој пат за оние во Средното општинско училиште „Маврово-Ростуше” во Ростуше.
Мерките ги соопшти градоначалникот Онер Јакупоски, кој денеска присуствуваше на настанот „Ден на отворени врати“ во организација на СОУ „Маврово-Ростуше”.
-Настанот предизвика голем интерес кај учениците од деветтите одделенија и нивните родители од сите основни училишта во нашата општина, кои имаа можност детално да се запознаат со условите и програмите на училиштето, информираа од општината.
Во своето обраќање, Јакупоски најави серија конкретни мерки и инвестиции кои ја потврдуваат посветеноста на локалната самоуправа кон младите и нивната иднина во родниот крај.
-Една од мерките е директна финансиска поддршка, за секој ученик кој ќе се запише во првиот уписен рок во СОУ “Маврово-Ростуше” кој ќе добива еднократна парична помош во висина од 12 илјади денари секоја учебна година, средства обезбедени директно од општинскиот буџет, додаваат од општината.
Ќе се стимулира успехот, при што во тесна соработка со училиштето, воведена е мерка со која сите ученици, од прва до четврта година, дополнително ќе бидат наградувани и стимулирани соодветно на нивниот постигнат успех во текот на учебната година.
Градоначалникот истакна дека во тек е процес на мапирање на сите тековни недостатоци во училиштето, кои ќе бидат целосно надминати и санирани до први септември, со цел учениците да ја започнат новата учебна година во современи и подобри услови.
Како дел од долгорочниот план за развој, најавено е дека од следната учебна 2026/2027 година во училиштето, ќе бидат отворени нови образовни насоки, со цел да се одговори на интересите на сите ученици и потребите на пазарот на труд.
-Нашата цел е јасна – квалитетно образование и силна финансиска поткрепа за секое семејство. Инвестирањето во нашите деца е инвестиција во иднината на Маврово и Ростуше. Сакаме младите да знаат дека нивната општина стои зад нив со конкретни дела, а не само со зборови- рече градоначалникот Јакупоски.
Посочи дека Општина Маврово и Ростуше продолжува да биде партнер на младите, создавајќи услови тие да се изградат во успешни личности токму тука, во својот дом.
