Дваесет и пет дечиња од семејства во социјален ризик од Општина Крива Паланка денеска заминаа на бесплатен летен одмор на сметка на општината, во рамки на мерката за бесплатно летување на деца од семејства во социјален ризик од Програмата за социјална, детска и здравствена заштита.
Градоначалникот на Општина Крива Паланка, Сашко Митовски денеска ја испрати новата група основци кои во наредните седум дена бесплатно ќе престојуваат во детскиот камп „Радости“ на брегот на Охридското Езеро.
Митовски им посака среќен пат, пријатен престој и убави спомени исполнети со дружење, игра и нови искуства.
Мерката се реализира трета година по ред, опфаќа целосно покриени трошоци за превоз, сместување, исхрана и осигурување, како и организирани спортски, едукативни и забавни активности под надзор на стручни лица. Право на користење на услугата имаат деца од социјално ранливи категории кои се редовни ученици во основните училишта на територијата на Општина Крива Паланка.
-Денес испративме уште една група деца во детскиот камп „Радости“ на брегот на Охридското Езеро. Овој бесплатен седумдневен камп е многу повеќе од обично летување, претставува одлична можност децата да се социјализираат, да создадат нови пријателства и да ги развиваат своите социјални потенцијали- изјави Митовски.
Тој истакна дека на оваа мерка гледа и како на значаен придонес во спречувањето на маргинализацијата на децата од социјално загрозени семејства.
-Сите деца, без разлика на нивната социјална положба, заслужуваат еднакви можности за раст, развој и среќно детство. Токму затоа продолжуваме да инвестираме во мерки што овозможуваат поголема социјална вклученост и еднакви шанси за секое дете- нагласи Митовски.
Годинава, вкупно 25 деца ги исполниле условите за користење на оваа мерка.
