Општина Гевгелија и годинава подготвува новогодишна забава на Градскиот плоштад, каде на 31 декември со почеток во 20:30 часот ќе биде организиран спектакуларен дочек на Новата 2026 година под мотото „Новогодишна магија“, а граѓаните и гостите ќе уживаат во богата музичка програма, специјални сценски настапи и празнична атмосфера, соопштија од локалната самоуправа.
Главна ѕвезда на новогодишната вечер ќе биде македонска музичка икона-Владо Јаневски, кој заедно со својот бенд ќе го донесе препознатливиот балкански шарм и емоција на сцената.
Покрај Јаневски, во музичка програма за дочекот на Новата 2026 година ќе учествуваат „Ситуација бенд“ и „Либра бенд“, за доброто расположение и подигање на атмосферата ќе се погрижи стенд уп урбаната легенда, Дејан Малзарков- Диверзија, а водител ќе биде Никола Опров.
Посетителите ќе имаат можност да уживаат во празнично украсениот плоштад, богата светлосна сценографија и музика која ќе ги води во најрадосните мигови од годината.
Општина Гевгелија ги повикува сите граѓани, но и гостите од регионот, заеднички да ја поздрават Новата 2026 година во позитивна и весела атмосфера.
Според градоначалникот Андон Сарамандов, Гевгелија заслужува да биде урбано место со богата музичка содржина преку целата година, а традицијата треба да се негува. Тој ги покани граѓаните заедно да ја дочекаат новата година.
