Под мотото „Да го одржуваме градот чист” Општина Дебар денеска реализираше голема еколошка акција, во која беа исчистени големи површини во градот и периферијата. 
Во акцијата учествуваа Јавното комунално претпријатие „Стандард”, општинската администрација и членови на Советот на општината, риболовци, граѓани, ученици, кои собраа голема количина отпад.
– Може да изразам големо задоволство од масовното учество во акцијата која го исчисти не градот. Сега доби лик како што заслужува. Апелирам до сите за поголема совесност и грижа и отпадот да го оставаат на места определени за тоа. Чистата средина значи и заштита на здравјето на сите нас. Голема благодарност за сите учесници, рече градоначалникот Фисник Меља, кој лично учествуваше во акцијата.
Апел за поголема совесност и грижа за чиста средина упати и директорот на „Стандард”, Нертил Османи, кој не го крие незадоволството од односот на дел од граѓаните, но и правни субјекти, кои ја загадуваат средината.
Исчистени беа и околните површини на повеќе станбени згради, каде јавна тајна е дека „домаќинките” фрлаат отпад преку балкони.
