Здружението „Икуалити“, во рамки на меѓународниот проект „ID: CITIZEN“, организира онлајн конференција посветена на унапредување на пристапноста, универзалниот дизајн и системските решенија за еднакво учество на лицата со попреченост во јавниот простор и заедницата.
На конференцијата, како што е најавено, ќе бидат претстави клучните искуства и резултати од студиските посети реализирани во Полска и Словачка како и публикацијата „Препораки за политики за подобрена инклузивност“ – документ со практични насоки и предлози за воспоставување системска пристапност, подобрување на движењето низ градовите, унапредување на јавните простори и примена на инклузивни практики во сите четири земји.
Главната порака на конференцијата е дека пристапноста не смее да биде привилегија или дополнителна мерка, туку основно право и составен дел од планирањето на секоја заедница. Доколку јавниот простор не е системски проектиран за сите граѓани, тој станува бариера која исклучува наместо да поврзува.
Конференцијата ќе ја предводат претставници на партнерските организации Здружение „Икуалити“ од Македонија, Фондација „Интеграција“ од Полска, Организација „Рака под рака“ од Унгарија и Здружение „Тененет“ од Словачка, а учество ќе земат претставници на институции, општини, професионалци од областа на урбанизмот, архитектурата, културата и социјалната инклузија, граѓански организации, како и сите засегнати страни кои работат на унапредување на пристапноста и еднаквото учество во општеството.
Проектот е поддржан од Меѓународниот Вишеградски фонд, кој ја поддржува регионалната соработка меѓу организациите на граѓанското општество за унапредување на нивните односи, размена и споделување идеи и промовирање на меѓусебно разбирање.
