Во учебната 2026/2027 година ќе има помалку ученици. Бројот не е конечен затоа што претстои трет упис во средно, каде што намалувањето не е драстично како во основните училишта.
Министерката за образование и наука Весна Јаневска соопшти дека значително помалку основци ќе следат настава од септември затоа што за разлика од лани, годинава се запишале околу 4900 помалку првачиња.
-Бројот не е дефинитивен затоа што уште ќе се запишуваат, дел од нив не се пријавени. Се надевам дека малку ќе опадне таа бројка, која е страшно голема во однос на демографијата. Жал ми е што го кажувам тој факт, го има објавено и Статистика, тоа се најновите податоци – околу 4900 првачиња помалку оваа година отколку лани. Колку и да се запишат, ќе бидеме со најмалку 3000 првачиња помалку. Тој тренд го очекуваме и следната година, што е поразително за оваа земја. За Владата е тоа загрижувачки елемент и постојано велиме дека треба да обрнеме особено внимание. Ние како МОН правиме сè за да ги подобриме условите за да ги задржиме во земјата, рече Јаневска на прес-конференција на која беа соопштени резултатите од државната матура.
Одговарајќи на новинарски прашања министерката соопшти и дека едносменска настава е воведена во над 200 училишта, речиси во целост во училиштата во неколку општини, како Кавадарци, Ѓорче Петров, Прилеп, Битола, Штип.
-Овој процес многу побрзо се спроведува во внатрешноста. Најголем проблем се општините на Скопје каде што се групира населението од државата, но имаме проект за доградување на повеќе од шест училници или некаде две до шест училници за да обезбедиме услови. Сите можни напори ги правиме до крајот на мандатот едносменска настава да имаме во целата држава, додаде Јаневска.
