Остварен планот за собрани и потрошени пари од државната каса во 2024, висока реализација на капитални инвестиции, помала буџетска дупка.
Министерството за финансии информираше дека приходите и расходите во Буџетот за 2024 година се реализирани на ниво над 96 отсто што е согласно планираното во Буџетот, додека буџетскиот дефицит е понизок од планираното за дури 2,5 милијарди денари односно на ниво од 4,4 отсто од БДП, а со ребалансот на Буџетот беше проектиран на ниво од 4,9 отсто.
Вкупните приходи во Буџетот за 2024 година се реализирани во износ од 306,3 милијарди денари или 96,3% од планираното. При тоа приходите од даноци и придонеси се реализирани во целост односно 99,7%, додека само од даноци остварувањето е 99,2%. Кај данокот на личен доход има остварување од 101%, данокот на додадена вредност 103,8%, кај данокот на добивка има оставрување од 95,6% и увозните давачки се со остварување од 95,3%, информираат од министерството за финансии
Прибирањето повеќе пари во државната каса е благодарение и на зголемената наплата на даноци од УЈП и Царина. Приходите од даноци се остварени во износ од 177,9 милијарди денари и се за 12,8 отсто повисоки од лани. Речиси 93 отсто од вкупните приходи во Буџетот се од даноци и придонеси, што говори за поефикасна наплата .Финансии информира дека се реализирани скоро 77 отсто од планираните капитални расходи до крај на 2024. Според буџетот на Владата на СДСМ и ДУИ, лани требаше да се реализираат капитални инвестиции од над 730 милиони евра, но до крајот на мандатот на претходната власт завршено беше едвај 28% од предвиденото.
Владата потрошила 67 милиони евра за реализација на коридорите 8 и 10 д, ова беше сумата што Владата одлучи да се даде на конзорциумот согласно програмата за работа наместо 250-те милиони евра кои беа предвидени предходно.
За реализација на проектот за изградба на автопатските делници од коридорите 8 и 10-д беа реализирани 4,1 милијарда денари, односно буџетот за 2024 година наменет за тој проект во целост беше остварен. Дополнителни 21,2 милиони денари се реализирани за општинските проекти, како и 165 милиони денари за проекти за подобрување на општинските услуги со заем од Меѓународната банка за обнова и развој (Светска банка). Расходите за стоки и услуги се реализирани во износ од 22,9 милијарди денари или 88% од планираното, велат од министерството за финансии.
2025-та година стартува ликвидно и со стабилни јавни финансии, информираат од Министерството за финансии. Во првиот Буџет на Владата на ВМРО – ДПМНЕ проектиран е економски раст од 3,7 отсто, буџетски дефицит 4 отсто од БДП. Приходите се 5,8 милијарди евра, а расходите 6,5 милијарди, додека капиталните инвестиции се проектирани на 800 милиони евра.
