Над два месеца по смртта на американската актерка Мишел Трахтенберг, властите во Њујорк официјално ја објавија причината за нејзината смрт.
Според магазинот „People,“ актерката починала од природна смрт, предизвикана од компликации поврзани со дијабетес. Овој заклучок е донесен врз основа на резултатите од токсиколошките анализи, соопшти Канцеларијата на главниот судско-медицински истражител, од каде исто така посочија дека ваквите тестирања може да се спроведат и без да се направи обдукција.
Мишел Трахтенберг почина на 26 февруари, на 39-годишна возраст, откако службите за итна помош во Њујорк одговориле на повик и ја затекнале во несвесна состојба, без знаци на живот. Смртта не се сметаше за сомнителна, па семејството одлучи да не се изврши обдукција поради нивната еврејска вера. Во јавноста првично се очекуваше причината за смртта да остане „неутврдена“, но резултатите од токсиколошката анализа дадоа јасни одговори.
Родена во Њујорк, Трахтенберг започна да глуми уште како дете. Светската слава ја стекна со главната улога во филмот „Шпионката Хариет“ (Harriet the Spy) од 1996 година, кога имаше само 10 години. Детските улоги и соработката со актерката Сара Мишел Гелар ја доведоа до популарната тинејџерска серија „Бафи – убиецот на вампири“ (Buffy the Vampire Slayer), која се емитуваше пред повеќе од две децении.
Нејзината последна, овојпат споредна, актерска улога беше во анимираната ТВ-серија „Шпионката Хариет“ од 2023 година, каде ја позајми гласот на ликот д-р Вагнер.
