Градот на мостовите Струга, е подготвен за 64-тото издание на Струшките вечери на поезијата. Од 21-ви до 25-ти август ,Струга ќе биде центар на светската поетска сцена.Ќе учествуваат 70 поети од земјава и странство,а за прв пат покровител на манифестацијата е Претседател на државата, во случајов Гордана Силјаноска Давкова. Лауреат на струшките вечери годинава е словачкиот поет Иван Штрпка,а добитник на наградата „Мостови на Струга“, полскиот поет Матеуш Шимчик.
“Струшките вечери на поезијата не се локална организација и не се локален настан. Освен тоа што се национални, ги надминуваат рамките на државата. Манифестацијата е широко етаблирана и позната во светот. Она што мора да го разбереме е дека вложувањето токму во таа меѓународна промоција на нашиот јазик и култура е тоа за кое што оваа манифестација е всушност наменета и тоа е нејзината основна цел“-рече Никола Кукунеш,директор на СВП
Покрај луксузната монографија на лауреатот Иван Штрпка, која се објавува тројазично, ќе бидат објавени уште неколку значајни публикации, а повторно ќе се одржат низа манифестации кои беа дел до Струшките вечери но замрена последните неколку години.
”Од другите фестивалски активности, значајни промени во програмата, треба да го истакнеме враќањето на она што се на некој начин белези на струшките вечери на поезијата. Оваа година е посветена на глаголицата како симбол на духовноста,на творештвото,на идентитетскиот темел кој ги поврзува народите”-рече уметничкиот директор Мите Стефоски
Повторно ќе се одржат читањата кај споменикот на Свети Климент на плоштадот во Охрид и патувањето со брод и поетското читање во „Свети Наум“. Поетското матине ќе биде во предворјето на црквата „Света Богородица Перивлепта“ во Охрид. Фестивалот повторно ќе го добие својот сјај исполнувајќи ја задачата да биде афирматор и промотор на македонската и светската поезија. Токму заради тоа постои овој фестивал и затоа е најголемиот и најзначаен културен бренд кој го има Македонија во светот.
