Судијата Ељведин Ферати од Кривичен суд Тетово, кој му досуди казна од 2 години затвор на Менсур Пајазити за усмртување на 22-годишната Теодора Ристевска на пешачки премин, нема да биде гонет од Обвинителството за наводно „пречкртаните оценки“ што ги имал во своето досие на државниот универзитет во Тетово.
Основното јавно обвинителство оформи предмет откако државниот просветен инспекторат пронајде три пречкртании оценки во главната книга, без при тоа да најдат и пријави за преполагање на испитите од страна на Ферати. Тие оценки биле важни, затоа што од нив зависело и дали Ферати ги исполнува условите да се пријави на Академијата за судии и јавни обвинители за каде е потребен просек над 8. Но, кога Обвинителството ја прибавило целосната документација за судијата од Правниот факултет при Државниот универзитет Тетово, таму ги нашле и пријавите за преполагње.
„Во прилог на досието беа доставени и материјални докази – барања, решенија и пријави за повторно полагање, како и доказ за добиени оценки за 4 предмети со кои факултетот потврдува дека во 2014 година студентот ги преполагал испитите и добил оценки со кои го зголемил својот просек над 8,00,“ изјавиле од Јавното обвинителство Скопје за „Слободен Печат“. Оттаму додаваат дека, имајќи ги предвид доставените документи, не се исполнети елементите врз основа на кои би можел да преземе кривичен прогон по службена должност.
