Со минута молк во знак на почит кон настраданите во трагедијата во кочанската дискотека „Пулс“, во која бројот на жртвите денеска се зголеми на 60, започнал денешниот состанок на стручнот колегиум на Јавното обвинителство во проширен состав. Обвинителскиот тим кој постапува во предметот за утврдување кривична одговорност реферирал пред колегиумот за преземените дејства до сега, со начинот и концептот на истражување и со стручните аспекти на предметот кои ги има предвид при истражувањето.
„Со оглед на тоа што денешната 60-та жртва од катастрофалниот пожар во Кочани е лице кое претходно било опфатено со наредбата за спроведување истражна постапка, во својство на управител на правно лице, Основното јавно обвинителство Кочани по прибавување на официјалната документација за настапената смртна околност ќе донесе наредба за запирање на истражната постапка за него“, информираа од обвинителството.
Стручниот колегиум на Јавното обвинителство изразил целосна поддршка за досегашната работа на обвинителите, кои во моментот паралелно водат истражна и предистражна постапка од широк опсег за целосно испитување на одговорноста за овој настан.
„Сите капацитети на Јавното обвинителство се ставени на располагање на тимот за ефикасно завршување на истрагата“, се вели во соопштението.
