Основното јавно обвинителство Штип поднесе обвинителен предлог против едно лице за кривично дело – насилство. Станува збор за скандалот во Штип на 24 август, кога на фудбалскиот стадион „Бело брдо“, за време на фудбалскиот натпревар помеѓу пионерските екипи на ФК „Брегалница“ од Штип и ФК „Шкупи“ од Скопје, еден од родителите на фудбалерите од гостинскиот тим нападна неколку дечиња од тимот на Брегалница, но и присутни во публиката.
Од Обвинителството велат дека осомничениот со грубо насилство ја загрозил сигурноста на оштетените две 15-годишни деца, кои биле играчи во тимот на „Брегалница“. На децата им нанел телесни повреди, а кај оштетените, останатата публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, кога судијата поради прекршок доделил втор жолт картон и го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот, информира Обвинителството.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.
