Јавен обвинител од Специјализираното одделение за гонење на кривични дела извршени од лица со полициски овластувања и припадници на затворската полиција при ОЈО ГОКК донесе Наредба за започнување истражна постапка против самостоен инспектор од Единицата за лично обезбедување на Претседателот на Владата на РМ, осомничен за кривично дело „Оддавање службена тајна“ извршено од користољубие.
Осомничениот, како службено лице, се сретнал со сведок на 30.3.2025 година на паркинг пред хотел во Велес и му покажал службени документи на МВР, кои претставуваат службена тајна. Тој му дозволил на сведокот да ги снима документите и му објаснил за што се однесуваат. Осомничениот го сторил ова за да ги објави документите на социјалните мрежи и за да прибави 50.000 евра од лицето за кое се однесуваат тие документи.
Јавниот обвинител, по разгледувањето на околностите, утврди дека се исполнети условите за предложување на мерка притвор. Судот го прифатил предлогот и осомничениот е ставен под притвор на 30 дена. За ова кривично дело, согласно член 360 од Кривичниот законик, предвидена е затворска казна од најмалку една година.
