Историското штипско Ново Село, ќе го враќа својот автентичен изглед преку заеднички прекугранични проекти меѓу Македонија и Бугарија, финансирани од фондовите на Европската Унија. Предвидено е да се реконструира една од старите куќи-донација од кардиохирургот со штипско потекло, Жан Митрев, која ќе го задржи изворниот архитектонски стил и ќе биде пренаменета во сместувачки капацитет. Дополнително ќе се инвестира и во сместувачките капацитети на бањата Кежовица, а целосно ќе се уреди локалитетот Л’џи од каде извира геотермална вода.
„Станува збор за туристичка понуда, со изградба на сместувачки капацитет во историското Ново Село, кое преставува музеј под отворено небо, реставрација на локалитетот Л’џи, извор на минерално-термална вода и реконструкција на сместувачкиот капацитет при бања Кежовица„ изјави градоначалникот на Штип, Иван Јорданов.
Штипско Ново Село, има потенцијал да привлече домашни и странски туристи. Освен старите куќи заштитени со закон, црквата „Успение на Пресвета Богородица„ и ретките икони, маалото кое во предилинденскиот период бил револуционерен центар, со своите споменици и објекти претставува вистински музеј под отворено небо. Ваквите проекти се клучни за збогатување на туристичката понуда, посочува Јорданов.
„Ова се проекти кои не само што ќе придонесат за развој на туризмот и за создавање на една клима за меѓусебна соработка, туку и ќе не мотивираат да продолжиме и понатаму. Верувам дека ова е само продлабочување на една успешна соработка и приказна која ја имплементираме со општината Гоце Делчев, од Бугарија, благодарение на ресорните министерства„ изјави градоначалникот на Штип, Иван Јорданов.
Во рамки на овој проектот за меѓугранична соработка во кој партнер е бугарската општина Гоце Делчев, Штип, ќе добие 240.000евра.
