Новоизбраната раководителка на Основното јавно обвинителство за гонење организиран криминал и корупција (ОЈО ГОКК), Искра Хаџи Василева, изјави дека притисоците врз обвинителите се реалност со која се соочува професијата, но оти носителите на обвинителската функција мора да останат отпорни и да одлучуваат исклучиво врз основа на закон, факти и докази.
Одговарајќи на новинарски прашања по рочиштето за случајот против судијата Ѓоко Ристов за нејзиниот избор, Хаџи Василева нагласи дека интегритетот е клучен за независното работење на обвинителите.
– Веројатно е природно обвинителската работа по својата суштина да трпи некакви притисоци. Наше е како обвинители да бидеме резистентни и да ставаме граница на овие притисоци. Не треба да се плашиме, притисоците се веројатно дел од човечката природа, како и интегритетот, кој сум убедена дека е дел од голем број обвинители – истакна таа.
На прашањето како би постапила доколку ѝ се јави носител на висока државна функција, меѓу кои и премиерот, Хаџи Василева рече дека институционалната комуникација е нормална, но не и евентуалните интервенции во конкретни предмети.
– Органите и институциите не е ништо спорно да соработуваат и тоа е природно, логично и разумно. Ако мислите на некакви интервенции или ургенции, тоа е веќе друго прашање и се разбира дека ние сме според Уставот самостојни и одлучуваме врз основа на право, факти и докази – нагласи Хаџи Василева.
Таа посочи дека формално функцијата ќе ја преземе по завршувањето на законските процедури во наредните две недели по што ќе се посвети на организациските прашања и на зголемување на ефикасноста на кривичниот прогон.
