Апелациониот суд во Скопје донесе ослободителна пресуда за Бојан Јовановски – Боки 13 во предметот „Меѓународен сојуз“, со што ја преиначи првостепената пресуда, со која тој беше осуден на пет години затвор.
За пресудата информираше адвокатот на Јовановски, Сашко Дуковски.
„Ете, правдата е спора, но достижна! Апелациониот суд во Скопје денес донесе ослободителна пресуда за Бојан Јовановски во предметот ‘Меѓународен сојуз’. Со тоа ја преиначи првостепената пресуда на Основниот кривичен суд од пет години!!“, објави Дуковски.
Судскиот процес се водеше против Јовановски, неговите помошнички Христина Блажевска и Јасна Мандиќ Ерцеговиќ, како и неговиот татко Миле Јовановски. Според обвинението, преку проект за изградба на домови за стари лица биле измамени двајца бизнисмени, а дел од парите уплатени за реализација на проектот биле искористени за финансирање на телевизијата „1ТВ“ и за лични потреби.
Во претходната постапка, Апелациониот суд веќе ја потврди ослободителната пресуда за поранешната пратеничка Фросина Ташевска-Ременски.
