Македонија за првпат доби Национален план за справување со масовни жртви – документ што треба да овозможи побрза, поорганизирана и координирана реакција на институциите кога во краток рок има голем број повредени и загинати. Планот е усвоен на владина седница на 10 март по предлог на Министерството за здравство, а беше презентиран на меѓународната конференција „Институционални и клинички аспекти и решенија по пожарот во Кочани – една година потоа“.
Министерот за здравство Азир Алиу рече дека документот е системски одговор на трагичните искуства од Ласкарци, модуларната болница во Тетово, автобуската трагедија во Бугарија и пожарот во Кочани.
„Вчера имавме настан ,конференција на која беа присутни многу ексерти од земјата и надвор од земјата, кои беа дел од тој екосистем пред една година кои помагаа со стручните тимови. Споредлија информации и искуства од другите земји , но и ние ја споделивме научената лекција која ни се случи пред една година, затоа еве за прв пат како држава , веќе вчера ја објавивме националната стратегија за справување со масовни жртви која како доукмент е за прв пат направен во нашата држава . Според тој документ понатаму ќе имаме план со кој ќе направиме нашите институции, нашиот систем да биде спремен за да може во реално време и брзо да делува кога ќе има потреба од таков тип на делување.“ – рече Алиу.
Планот за првпат дефинира кој што прави кога бројот на повредени ги надминува редовните капацитети на здравствениот систем, при кризни ситуации како сообраќајни несреќи, пожари, природни катастрофи или индустриски инциденти.
Одговорот е организиран на три нивоа: стратегиско – со кризно управување и координација на институциите; болничко – со организација на прием и третман на повредени; и предболничко – со теренска тријажа, итна помош, евакуација и транспорт.
Целта е намалување на смртноста, зголемување на преживувањето и подобра институционална координација. Планот е изработен со поддршка на Светската здравствена организација и усогласен со препораките на НАТО, а во подготовката биле вклучени повеќе институции и служби.
На конференцијата беше претставен и првиот национален протокол за изгореници, со стандарди за проценка, тријажа, транспорт, лекување и рехабилитација на пациентите.
Надлежните најавуваат дека неговата примена ќе се реализира преку обуки и симулациски вежби, со цел државата во иднина побрзо и поефикасно да реагира кога секоја минута значи спасен живот.
