На вториот ден од студиската посета, делегацијата од Собранието составена од пратеници – членови на Комисијата за европски прашања и Националниот совет за евроинтеграции, како и претставници од собраниската служба, оствари повеќе средби во Хрватскиот сабор.
Во рамки на посетата, како што соопшти собраниската прес-служба, се одржа средба со потпретседателката на Хрватскиот сабор, Сабина Гласовац, на која се разговараше за актуелни парламентарни прашања и зајакнување на меѓусебната соработка.
Потоа делегацијата остварила средба со генералниот секретар на Саборот, Давор Орловиќ, како и со шефот на Кабинетот на претседателот на Саборот, Матеј Бречиќ, при што биле разменети искуства за организацијата и функционирањето на парламентарните служби.
Средбата со Јелена Милош, претседателка на Комитетот за европски прашања и претседателка на Меѓупарламентарната група за пријателство Хрватска – Македонија, била посветена на дискусија за позицијата на државата пред и по членството во Европската Унија, како и за предизвиците и придобивките од евроинтегративниот процес.
Во продолжение, биле разгледани прашања поврзани со функционирањето на парламентарните служби, институционалната координација и размената на релевантни искуства во текот на процесот на европска интеграција.
Во насока на зајакнување на меѓупарламентарната соработка, делегацијата остварила средба и со Кристина Икиќ-Баничек, претседателка на Комисијата за меѓупарламентарна соработка, при што била потенцирана важноста од продлабочување на партнерските односи меѓу двата парламента.
На средбите било истакнато дека долгогодишната стабилна соработка меѓу двата парламента е потврдена преку бројни билатерални посети. Било нагласено дека преку досегашната соработка е разменето значајно искуство во областа на европските интеграции и законодавните процедури.
Посебно било истакнато дека Хрватска, како последна земја членка што се приклучи на Европската Унија, има длабоко разбирање за сложеноста на пристапниот процес и претставува силен поддржувач на европската перспектива на Македонија.
Соговорниците потенцирале дека службените лица располагаат со високо ниво на експертиза и искуство и изразија подготвеност за понатамошна соработка. Парламентарната експертска служба беше посочена како компетентна и етаблирана, особено преку искуството стекнато за време на процесот на пристапување во Европската Унија.
Во продолжение на студиската посета, како што се наведува во соопштението, се предвидени и заеднички дебати помеѓу службите на двата парламента, како и подготовка на проактивни предлози и насоки за унапредување на институционалните процеси и меѓусебната соработка.