Заменик претседателот на Владата и министер за транспорт, Александар Николоски, е дел од високата делегација предводена од претседателот на Владата, Христијан Мицкоски, која се наоѓа во работна посета на Обединетите Арапски Емирати. Во рамки на посетата се предвидени низа економски средби со претставници на државни инвестициони фондови и бизнис комори.
Посетата вклучува повеќе средби кои ќе се фокусираат на можностите за економска соработка, потенцијалните инвестиции и можни инфраструктурни проекти. Официјалната посета на Обединетите Арапски Емирати е организирана по покана од Неговото Височество Шеикот Мухамед Бин Зајед Ал-Нахјан, претседател на ОАЕ и владетел на Емиратот Абу Даби.
Во текот на посетата, ќе бидат остварени средби со претседателот на ОАЕ и владетелот на Емиратот Абу Даби, Н.В. Шеикот Мухамед Бин Зајед Ал-Нахјан, како и со Н.В. Шеикот Мохамед бин Рашид Ал Мактум, потпретседател и премиер на ОАЕ и владетел на Емиратот Дубаи, како и со државни инвестициони фондови на Емиратот Абу Даби и стопански комори.
