Законски измени, материјална и техничка поддршка. Владата со стратегија да го врати имиџот на Македонска пошта и да обезбеди подеднакви услови за сите на пазарот. По повеќегодишна запоставеност, конечно се случуваат промени кои стартуваат со донација на 100 комби возила. Дополнително се работи и на програма што ќе го подобри софтверот, а со тоа се очекува да се унапредат условите за работа и да се подобри квалитетот на услугите кон граѓаните. Во таа насока, Вицепремиерот и Министер за Транспорт Александар Николовски најави и законски измени и консултации со сите чинители на поштенскиот пазар со главна цел – заштита на државниот капитал и негов развој.
„Многу е лесно да се земе делот од пазарот што е профитабилен и што одговара, а Македонска пошта да има општествена одговорност – писмото што јас денеска ќе му го праќам на градоначалникот на Вевчани да го однесе во услови кога никој друг не го прави тоа. За ова ќе разговараме во следниот период зашто состојбата не може да остане ваква – или сите подеднакво ќе го носат товарот или ќе носиме други одлуки. Мојата намера е Македонска пошта да расте, а не да пропаѓа “– истакна вицепремиерот и министер за транспорт Александар Николоски.
Николоски истакна дека Македонија во континуитет ја следи европската пракса за регулација на поштенскиот пазар, иако земјата не е членка на ЕУ, што создава сериозни предизвици за функционирањето на Македонска пошта. Притоа подвлече дека оваа Влада има јасна определба да го заштити државниот капитал и државните компании, за разлика од претходни влади кои, како што рече, биле подготвени да ги продаваат.
Во моментов на македонскиот пазар има дури 29 субјекти кои се занимаваат со оваа дејност. Но само АД Пошта на Македонија е во државна сопственост, а со тоа и со најголема одговорност. Директорката на Агенцијата за пошти најави низа промени, за кои вече има и конкретни планови. Освен законските измени, планирани се и низа други активности во насока на зголемување на ефикасноста но и безбедноста на услугите. Ова е неопходно ако се има предвид дека електронската трговија доживува своевиден бум, а со тоа и расте потребата од услууги на поштенските субјекти и доставувачи на пратки:
„Во моментов на пазарот работат 29 лица од кои АД Пошта на Македонија со индивидуална дозвола за обезбедување на универзална услуга и 28 правни лица за општо овластување за обезбедување на поштенски услуги. Оваа година издадени се вкупно 8 општи овластувања. Две на нови компании кои за прв пат направија влез на поштенскиот пазар од кои едната за домашни услуги за писма и пакети со мрежа на цела територија на државата, а вториот давател доби дозвола да работи локално за Скопје за пакети. Приватната конкуренција никогаш до сега немала толку густо развиена поштенска мрежа низ државата и толку голем број на луѓе не биле ангажирани во доставата.“– вели директорката на Агенцијата за пошти, Марина Тоневска.
Според анализата на пазарот за поштенски услуги на Агенцијата за пошти, за првото полугодие од 2025 година има зголемување на вкупен обем на пратки и на пакети. Ваквиот тренд е присутен речиси секаде. Клучниот предизвик е во делот на ефикасноста, почитување на роковите за испорака, но и со работната сила, односно ндеоволниот број работници.
