Вицепремиерот и министер за транспорт, Александар Николоски, денеска оствари работна средба со претставници на ЗЕЛС. На средбата се разгледувале можностите за воспоставување законски рамки за уредување на постапката за поставување урбана опрема, односно можноста за изработка на нов правилник. Имајќи предвид дека поставувањето на урбана опрема не е унифицирано и секоја општина самостојно ја уредува оваа постапка, се очекува преку новото решение да се изготви единствена постапка за поставување урбана опрема која ќе важи на целата територија на државата. Работната група, составена од претставници од Министерството за транспорт и ЗЕЛС, во следниот период ќе работи на подготовка на прописите.
„Ова е пример како полесно и во интерес на општеството ги решаваме сите предизвици кои се на товар на општините“, истакна вицепремиерот Николоски по средбата.
