Нелиценцирани планинарски водичи и натаму водат туристички групи по македонските планини, иако не се соодветно обучени за справување со ризици и спасувачки ситуации. Дел од нив, предупредуваат експертите, водат и авантуристички тури без елементарни планови за управување со ризик, што директно ја загрозува безбедноста на туристите. Во авантуристичкиот туризам ризикот е секогаш присутен, па затоа безбедноста мора да биде на прво место, велат од спасувачките служби. Посочуваат дека водичите мора да бидат професионално едуцирани и обучени да реагираат во опасни ситуации, но во пракса и понатаму туристи се водат од лица кои немаат соодветни квалификации.
“Сеуште водичи кои што се лиценцирани за непрофесионални тури, односно за водење на волонтерски тури во рамки на планинарски клубови, водат туристи, цели групи туристи за кои што апсолутноне се соодветно едуцирани. Многу даватели на услуги и сведоци сме дека немаат елементарни плани за управење со ризици. Планот за управење со ризици е тој кој што треба да јанамали опасностаоднесреќи. Сето ова се системски прашања кои што треба да бидат решавани системски, а не адхок.”–вели Антонио Додевски,планинарска спасителска служба.
Иако македонските спасувачи технички не заостануваат зад колегите од регионот и работат по меѓународни стандарди, кај нас планинското спасување сè уште не е системски регулирано, а службите функционираат главно на волонтерска основа и со минимална финансиска помош. Охридската служба во моментов покрива пет општини. Охрид е единствената општина која обезбедува само мал дел од средствата потребни за функционирање. Во државата постојат 12 организации со повеќе од 250 волонтери подготвени за интервенции, но многу од нив немаат ниту елементарна опрема за работа.
“Бројот на несреќи апсолутно ќе расте,ова наговестува дека тоа што сега го имаат Словенија и Хрватска со преку 700-800 интервенции годишно дека не очекува и нас. Не знам што треба да се случи за да се свестиме и да конечно седнеме и системски да ги решаваме работите. Многу е жалосно особено што веќе ние почнуваме да гледаме демотивација кај нашите волонтери “.- вели Додевски.
Само во охридскиот регион зимава имало десетици интервенции, меѓу кои и неколку сериозни спасувања, а македонските тимови биле вклучени и во акцијата за спасување словенечка скијачка на Шар Планина.