Од целосно нефункционален систем и изгубена доверба во полицијата, до бројки што покажуваат дека правдата и сигурноста им се враќаат на граѓаните – Во отчетот по повод една година Влада, од Министерството за внатрешни работи посочија дека ја завршиле првата година со темелни реформи. Министерот Тошковски презентирајќи го отчетот акцентот го стави на 14-те разбиени организирани криминални групи, откриените 860 кривични дела поврзани со дрога – запленетите 430 килограми наркотични супстанции – спречените обиди за нелегален влез во земјава и поднесените 125 кривични пријави за корупција. Во време кога правдата е потребна повеќе од кога било, овие резултати говорат за сериозна промена во односот кон криминалот и корупцијата, посочи Тошковски.
„Ова покажува дека нема недопирливи и дека правдата ќе стигне до секого, без разлика на име и преземе или функција. Разбивме 14 организирани криминални групи, во нив имаше над 200 сторители, а меѓу нив и брутална група вмешана во девет убиства, изнуди, палења и напади врз полицијата. Ова е доказ дека државата си ја враќа силата и нема да толерираме никакви насилство“, изјави Панче Тошковски.
17-те милијарди денари е проценетата штета од коруптивните шеми во здравството, енергетиката, безбедносниот и даночниот систем. Овие системски пропусти и злоупотреби произлегуваат од долгогодишно занемарување и недоволна контрола, што им овозможи на криминалните структури да делуваат без последици, посочи Тошковски. Министерството поднесе пријави против 107 физички и 18 правни лица, порачувајќи дека периодот на недопирливост заврши. Тошковски се осврна и на трагедијата во Кочани, каде во пожарот во дискотеката „Пулс“ загинаа 62 млади луѓе, а над 200 беа повредени. За првпат, МВР спроведе обемна истрага – со пријави против десетици одговорни лица, вклучително и поранешни и актуелни функционери.
„МВР отпочна најголема истрага досега која резултираше со поднесување на повеќе кривични пријави против десетици сторители – меѓу кои што има поранешни и актуелни министри, директори, градоначалници, раководители на институции, полициски службеници и други носители на функции“, изјави министерот за внатрешни работи Панче Тошковски.
Тошковски потсети на хаосот со пасошите, за кој рече дека веќе е минато, набавена е нова машина за издавање документи па сега тие се издаваат на време и со ред. Нов софтвер за менаџмент на воздухопловни операции дигитални алатки за форензика и сервис за „One stop shop“. Унапредено е нивото за безбедност на личните податоци во МВР. Со вложувања во нова опрема, реконструкција на објекти, отворени управни служби и засилен граничен надзор, од МВР велат дека ова е само првиот чекор кон долгорочна стабилност и поставување на здрав систем во државата.
